Kalaallit inuusuttuaqqat assammik arsartartut piukkunnaatillit Danmarkimi katerisimaartinneqarnerat iluatsilluarpoq.

Kalaallit inuusuttuaqqat Danmarkimi najugaqalersimasut piukkunnaatilinnik TAAK aaqqissugaanik siullerpaamik kateritsinneqarput. Sungiusarneq Vissenbjerg Idrætscenter-imi ingerlanneqarpoq, tassanilu nukappissat nivissallu 20-it katersuunneqarlutik, taakkuuppullu Danmarkimut ilinniariartorlutik najugaqartut.

Suliniut iluatsilluaqaaq ullorlu taanna sungiusarnerit saqqummiinerillu isumassarsiuffiullutik. Kalaallit nunaat sinnerlugu nunanut allanut unammisartuusimasut Rasmus aamma Jakob Larsen sungiusarnerit ingerlappaat, tassani misilittagarpassuit saqqummiunneqarlutik. Ullup qeqqasioreerlutik qatanngutigiit pilersaarusiornernut takorluukkaat saqqummiuppaat, tassanilu erseqqissarneqarpoq siunissami nunanut allanut unammisartuusinnaasunik nassaartarnissaq kaammattorlugillu assammik arsarnermi ingerlatitsiuarnissaq. Ilanngullugulu ersarissarpaat TAAK siunissaq ungasinnerusoq pillugu inuusuttut ineriartornissaat pillugit kattuffiup suliniutigigaa.

Jakob Larsen, TAAK-mut pilersaarusiornernut siunnersortaanerata saniatigut Nykøbing Falster-imi sungiusaasuusoq, ulloq ingerlalluarsimasoq nalunaarutigaa. Erseqqissaatigivaa taamatut kateritsitsineq unammisartunut attaveqaqatigiinneq aammalu ineriartornissaannut aningaasatigut kalluaaneq ajortoq.

“Ulloq ataaseq atorlugu kateritsitsinerit amerlasuunngorsinnaapput taamalillutalu qulakkeersinnaallugu arsartuutigut malinnaaffigilluarsinnaallugit. Ulluinnarni klubbiminni sungiusartarnerat pingaaruteqartaqaat, kisiannili sapaatip akunneri arfinillit allorlugit takusarsinnaagutsigit piumassuseqalernissaannut kaammattoorsinnaavagut” Jakob Larsen oqarpoq.

Naak ukiuminnik nikingagaluarlutik arnat angutillu akuleruukkaluarlutik, ulloq ingerlalluaqaaq. Nuannaarsuaqaat piukkunnaateqartullu ersareqaaq. Angajoqqaat, aanaakkut/aataakkut arlaqaalupput, malinnaalluaqaallu, meeqqat timersornikkut ineriartornerannut angajoqqaaniit tapersersorneqarnerannut pingaaruteqarneranik takutitsilluni.

TAAK-p taamatut kateritsitsinerit suli amerlinissaannut qilanaaqaaq, siunissamilu kalaallit assammik arsallammannik ineriartortitsinerat ingerlatinnassallugu.