Assammik arsartartut kattuffiata kujamissutsiminnik suliaqarniartunik pimoorussisoqartarneranik nuannaarutigeqaa, timersorneq tamaat eqqarsaatigalugu pingaartumillu assammik arsarneq eqqarsaatigalugu.
Taamaattumik nuannaarutigeqaarput kattuffimmi siulersuisuni ilaasortaq, Mia Ege Rasmussen, Tasiilami sulinngiffeqartilluni meeqqanik inuusuttunillu assammik arsarnermik soqutigisaqarnersut paasiniaaffigilaarmagu. Qujanartumillu paasinarsivoq sunaaffa assammik arsarluni piukkunnaateqartoqartoq.
Meeqqat arfineq pingasuniit ukiullit 18-lu ukiullit tikillugit peqataapput. Naak ukiumikkut nikingagaluarlutik imminnut tamarmik inissaqartitsipput.
Tasiilap timersortarfiani assammik arsartoqartarnissaannik pimoorussisoqartoq paasinarsivoq, ajoraluartumilli suli assammik arsarnermik peqatigiiffiliortoqanngilaq. TAAK-p paasisai naapertorlugit sapaatip akunnerani marloriarlutik assammik arsarnermik sungiusarnissamut periarfissaqartoq, tamatigut nalunaaquttap akunnerinik marlunnik sungiusarsinnaallutik.
Kattuffimmiit kaammattuutigiinnarsinnaavarput Tasiilami assammik arsarnermik immikkoortortaqaleqqullugu, taamaasillutillu meeqqat inuusuttullu sunngiffimminni assammik arsarneq aqqutigalugu susassaqartittalerlugit.
Taamatut misitinneqarnerput Tasiilamut qujaqaagut. Assammik arsarnermut immikkoortortaqarlernissaanut aallartisarniarpata kattuffimmiit tapersersussaqqaarparput.
Periarfissaqalissagaluarpat naapinnissamut qilanaaqaagut.