U18 nunarsuatsinni pissartanngorniuunneranni Kalaallit Nunaat Gruppe E-mi unammineq kingulleq ajorsartinneqarpoq.
Ullumi unamminermi naapinneqarput Kinesisk Taipai, muminnermi 15-5 siuaqqasut unamminerlu naammassimmat 28-15 ajugaallutik.
Sungiusaasoq Victoria Budek Svendsen imatut naliliivoq:
”Ullumi unamminermi immikkoortoq siullermi assersuiilluarnerput takutipparput, Chinese Taipai sivisuumik isertitsinngitsoortillugu, naak unammineq aallartiinnartoq mål-inik tallimanik siuaraluartut. Unamminermut pulaqqinnissatsinnut periarfissaqaraluarluta mål-iniittuaq qaangeruminaatsipparput, saassussinerigullu iluatsinnaveeramik unammisatta assersuinerat sassasissoq qaangernaveeratsigit. Mål-iniittuuterput Jaliina Jakobsen unamminerup immikkoortut siulliup qiteqqunnerata nalaani assamigut kilerpoq, ajoraluartimillu unamminerup sinnera peqataasinnaajunnaarluni.Ajutoorneq sakkortorpasikkami unammisut sinnerinut sunniuteqarluni. Jaliinalli ajoqusernera taamarsuunngilaq, taamaakkaluartoq nalilerluassavarput qaqugu unammeqqissanersoq.”
Sungiusaasoq imatut nangeqqippoq:
”Mumikkatta pisut eqqartorluaqaagut, unamminerullu immikkoortut aappani aallartilluaqaagut piumassuseqarnerullutalu. Minutsit siulliit 15-it 7-5 ajugaaffigaarput. Taamaasinerani Chinese Taipai sungiusaasuat timeout-erluni, taassumalu kingunerisaanik suli sassasinnerusumik assersuilerlutik. Unamminerup naanissaanut minutsit pingasuinnanngortut tungaanut malinnaalluaqaagut, tassanilu sukkasuumik isertitsisaqattaalerlutik. Unamminerup immikkoortup aappaa qiviarlugu unamminissanut tullinnguuttunut nangeqqinnissaanut atorluarsinnaavarput. Arnartatta unamminerat tulluusimaarutigeqaara, taamattuttaaq unamminermut pulaqqinnerat nuannaarutigalugu.”
Victoria Budek Svendsen imatut naggasiivoq:
”Aallarniutaasumik unamminerit pingasut siunissami atorluarsinnaasaminnik misilittagaqalerput. Maannakkut unamminerit sisamaasussanut siumut qiviartariaqalerpugut, tassa President Cup-imik taasartagaannik, aqagulu pisariaqartumik qasuersaassaagut. Pisinnaasarput tamaat akiuuttassaagut, unammisassallu tullinnguuttut nalilersorluassavagut.”
Kalaallit Nunaat ataasinngorpat 19. august nal. 05.00 Argentina-mut unammissaaq, taavalu marlunngorpat 20. august nal. 03.00 Kasakhstan-imut unammissalluni.
Kalaallit isertitsisut:
Madeline Bjørnestad 5 mål
Bea Jensen 5 mål
Amaunalik Møller 3 mål
Hannah Kleist 2 mål