Ilimagineqareersutuut Kalaallit Nunaat U18 arnat Nunarsuatsinni pissartanngorniuunneranni aappassaanik aallarniutaasumik unammineranni sakkortuunut unammipput. Unammineqarput Danmark, taakkuuppullu aallarniutaasumik unamminerni ajugaasussatut ilimagineqartut.
Kalaallit Nunaat IHF-imut 1998-mi ilaasortanngormalli aatsaavissuaq Kalaallit Nunaat Danmark-ilu nunani allanut unammisartuunermi naapipput. Tamannalu Danmark 42-8-mik ajugaaneranik kinguneqarpoq, muminnermi 20-5 siuaqqareerlutik.
Nunanut allanut unammisartut sungiusaasuat Victoria Budek Svendsen imatut oqaaseqarpoq:
”Unammisartutsinnut unammineq sakkortoqaaq, taamaakkaluartoq assersuinermi kusanartumik takutitseqaat. Qallunaat sukkasuumik saassussineri peerutsigit, Danmark amerlagisassaanngutsunik nalinginnaasumi saassussigaangamik isertitsinngillat, assersuilluaraangattalu aamma mål-iniittut tigusassatik annattarpaat. Saassussigaangattali qallunaat sassasissumik assersuinerat ajornartorsiutigisarlugu, amerlavallaanillu kukkutinneqartarluta.”
Nunanut allanut unammisartut sungiusaasuat Victoria Budek Svendsen imatut nangippoq:
”Piareersarnigut eqqarsaatigalugit nunat allat piareersartarnerannut sanilliutissagutsigit unamminitsinni kukkullattaarnissatsinnut sillimmasariaqarpugut taamatuttaaq artorsartinneqaraangatta. Kisianni unammineq tamaat, 60 minutsit, kusanartumik akiuulluaqaagut, takusinnaallugulu unamminerniit unamminernut pitsanngoriartornigut nassatarisinnaavagut. Uani unamminermi iluatsittut aallarniutaasumik unamminermut kingullermut aqagu unamminissatsinnut nassassavagut”
Aqagu unammisassat Kinesisk Taipai ullaakkut nal. 09.00, uanilu gruppe nr. 3-ngorniunnerulluni.
Kalaallit isertitsisut:
Madeline Bjørnestad: 4
Bea Jensen: 1
Tukummeq Berthelsen 1
Najaaraq Heilmann 1
Amaunalik Møller 1