Ukioq manna Kina-mi nunarsuatsinni U18 arnat pissartanngorniuunnerini Kalaallit Nunaat aammaarluni Canada-mut saassussigaangami kukkuluttortarpoq, kisiannilu assersuinerni suli pitsanngoriartorlutik. Unammisut minutsit siulliit naaligeeqaat kalaallilli anisitaasoqarneratigut Canada målinik pingasunik siuariasaarpoq. Kalaallit Nunaat akiuulluarnermigut Canada qanilleqqippat, kisianili Canada aamma sukataaqqinnerani muminnermi 13-9 siuaqqavoq.
Unamminerup immikkoortuata aappa siullermisut ingerlanneqarpoq, assersuisarnerilli iluatsinnaviilermata Kalaallit Nunaat time-out-erpoq. Sassasinnerusumik assersuisarniarlutik aaliangernerat iluaqutaanngitsumik Kalaallit Nunaat immikkoortup aappaa 14-9-mik ajorsarpaat taamaasilluni Canada-mut unammineq kalaallit 18-27 ajorsarfigaat,
Nunanut allanut unammisartut sungiusaasuat Victoria Budek Svendsen imatut naliliivoq:
”Aammaarluta assersuinermi ajunngitsumik ingerlavugut, saassussisarnerilli ajornartorsiutigaagut, taamaalilluta unamminermi ajorsarpugut. Sakkuusivinniit assigiinngitsorpassuit atoraluarpakka, sunali tamaat iluatsinngitsoorpoq Canada-mut angummanniarnitsinnut.
Saassusisarnigut aammalu anisitaasoqartilluta angerlarutta sungiusangaatsiassavagut. Soorunami klubbiminnut uterunik aammalu siunissami katersuuteqqittalerutta. Naak kingullinngoraluartugut takusinnaavara niviaaluit siuariartortut sungiusaqatigiittarnissatsinnut katersuuttarnerit eqqarsaatigigaanni maani angusarput ilimagineqartutut nalilerneqarsinnaavoq.
Unammisartuusugut VM-imut anngunnerput tulluusimaarutigeqaarput peqataanerpullu ilinniutaasoq oqarsinnaavugut. Aammattaaq Kalaallit Nunaat sinnerlugu Vm-imi takutitsinerput puigugassaanngilaq.
Neriuppugut U20 nunarsuatsinni pissartanngorniuunnissaannut anngussinnaalluta (anngunniuunnerit 2025-imi ingerlanneqassapput nunarsuatsinnilu pissartanngorniuunneq 2026 ingerlanneqassalluni). Maannakkut peqataasut amerlanerit taamanikkussamut peqataasinnaakutsoorput, taavalu maannakkut ajutooqqasut qaangerunikkit uteriarpata sakkortunerulertussaapput, Taamatuttaaq ilimanarpoq suli nukarliunerulaartuni piukkunnaateqaleriasaartut” Victoria Budek Svendsen naggasiivoq.
Isertitsisut: Madeline Bjørnestad – 6 mål
Hannah Nielsen Kleist – 3 mål
Kira Brandt Petersen – 3 mål
Arnannguaq Berthelsen – 3 mål
Pilunnguaq Olsen Petersen – 2 mål
Najaaraq Heilmann – 1 mål