U18 Kina-mi nunarsuatsinni pissartanngorniuunnerni inaarutaasumik inissinniuunnerni ullumi Kalaallit Nunaat Chile-mut unammivoq, tassani ajugaasut nr. 29-30-nngorniuunnissamut ingerlaqqittussaallutik.

Chile kalaalliniit piareersimanerusutut unammineq aallartippaat, minutsillu siulliit 15-it ingerlareersut Chile 7-3-mik siuarluni. Taamaasinerani Kalaallit Nunaat time-out-erniarluni aaliangerpoq, allatut iliuuseqarniarluni. Minutsillu tulliuttut tallimat iluani Kalaallit Nunaat tallimaraarpoq Chile isertitaqanngitsoq, taamaasillunilu 8-7-mik Kalaallit Nunaat siuarluni. Taassuma kingorna naligiillutik unammipput, unamminerullu immikkoortup siulliup naajartornerani kalaallit mål-it napasui eqqoqattaalerlugit, tassalu Chile 13-11-mik siuaqqalluni mumipput.

Unamminerup immikkortup aappaa aallartiinnartorlu Kalaallit Nunaat aallartilluaqaaq, minutsillu tallimat ingerlareersullu kalaallit 15-14 siuaqqalerlutik, ajoraluartumillu anisitaasoqarnerup kingunerisaanik Chile angummateqqilerluni. Minutsit qulit ingerlareersut Chile 19-17-imik siuarpoq. Taamaasinerani Kalaallit Nunaat time-out-erput, taassumalu kingorna unamminermut uteqqilluni. Minutsit 15-it ingerlareersut unammineq naligiiffiuvoq, 21-21. Minutsilli tulliuttut Kalaallit Nunaat isertitsinaveerpoq, unamminerlu 24-29 ajorsarfigalugu.

Nunanut allanut unammisartut sungiusaasuat Victoria Budek Svendsen imatut oqarpoq:

”Unamminermi immikkoortoq siullermi siuaqqalluta mumittussaasugut misinnarpoq,misigigakku Chile-ituut unammilluarsinnaalluta. Kisiannili saassussigaangatta kukkuluttortarnigut amerlavallaarmata. Tamakkuli aatsaat unamminerit amerlanerit sungiusaqatigiinnerillu amerlanerit pinngorpata pitsanngornerusinnaapput.

Unamminerup immikkoortuata aappaa aallartimmat aallartilluaqaagut, kisiannili unamminerup naammassinissaa minutsit kingulliit 15-it arsat annaasat isertitsinngitsoornerillu amerlavallaarput, taamaattumik unamminermi ajugasinnaanngilagut. Tamakkuli iluarsineqarsinnaapput unamminerit sungiusaqatigiinnerillu amerlisarnerani.

Misigisimavunga immitsinnut ajorsartugut, Chili.mut ajorsarata.

Nuannaarutigaarali ullumi arsartuutigut arfineq-marluk isertitsimmata, tassa ajunngitsumik ingerlavugut” nunanut allanut sungiusaasoq Victoria Budek Svendsen naggasiivoq.

Aqagu tallimanngornermi nal. 02.15 Kalaallit Nunaat – Canada unammissapput. Kingullinngunnginnissaq unammissutigissavaat.

Isertitsisut:

Madeline Bjørnestad  – 7 mål
Hannah Nielsen Kleist            – 4 mål
Kira Brandt Petersen  – 4 mål
Pilunnguaq Olsen Petersen     – 3 mål
Hannah Petersen         – 2 mål
Arnannguaq Berthelsen          – 2 mål
Amaunalik Møller      – 2 mål